रुपन्देही खबर , ५० पटक हेरिएको
भैरहवा, असोज ३०
मिथिलाञ्चल समुदायको मौलिक भाषा, संस्कृति, परम्परा र सांस्कृतिक पहिचानको संरक्षण तथा प्रवर्द्धन गर्ने उद्देश्यले रुपन्देहीको भैरहवामा शुभकामना आदानप्रदान तथा झिझिया सांस्कृतिक कार्यक्रम सम्पन्न भएको छ। मिथिलाञ्चल समाज रुपन्देहीको आयोजना तथा मिथिलाञ्चल महिला समाज रुपन्देहीको सहआयोजनामा विजयादशमी, शुभदीपावली तथा छठ पर्वको अवसर पारेर सिद्धार्थनगर नगरपालिका–६ मा कार्यक्रम आयोजना गरिएको हो।
मिथिलाञ्चल समाज रुपन्देहीका अध्यक्ष अमरकुमार झाको अध्यक्षता तथा नेपाल विद्युत् प्राधिकरणका लुम्बिनी प्रदेश प्रमुख मनोज यादवको प्रमुख आतिथ्यतामा सम्पन्न कार्यक्रममा वक्ताहरूले मौलिक संस्कृति र परम्पराको संरक्षण गर्दै नयाँ पुस्तासम्म हस्तान्तरण गर्नुपर्नेमा जोड दिएका थिए। कार्यक्रममा झिझिया नृत्यसहित विभिन्न सांस्कृतिक प्रस्तुति गरिएको थियो भने नृत्य प्रस्तुत गर्ने कलाकार तथा व्यक्तित्वहरूलाई नगदसहित सम्मान गरिएको आयोजकले जनाएको छ।
कार्यक्रममा बोल्दै प्रमुख अतिथि यादवले मौलिक संस्कृति, परम्परा र रीतिरिवाज कुनै पनि समुदायको पहिचान र गौरवसँग जोडिएका महत्त्वपूर्ण सम्पत्ति भएको बताउनुभयो। आधुनिकता र बदलिँदो जीवनशैलीका कारण कतिपय मौलिक संस्कृति तथा परम्परा ओझेलमा पर्दै गएकाले तिनको संरक्षण, संवर्द्धन र निरन्तरताका लागि सबैले आ–आफ्नो क्षेत्रबाट पहल गर्नुपर्ने उहाँको भनाइ थियो।
यादवले चाडपर्व तथा सांस्कृतिक कार्यक्रमले विभिन्न समुदायबीच आपसी सद्भाव, एकता, भाइचारा र सामाजिक सम्बन्धलाई थप सुदृढ बनाउन सहयोग पुर्याउने उल्लेख गर्नुभयो। मिथिलाञ्चल समुदायको भाषा, कला, संस्कृति र परम्पराले नेपालको सांस्कृतिक विविधतालाई समृद्ध बनाउन महत्त्वपूर्ण योगदान पुर्याएको बताउँदै उहाँले नयाँ पुस्तालाई आफ्नो समुदायको इतिहास, सांस्कृतिक महत्त्व र परम्परागत अभ्यासबारे जानकारी गराउनुपर्नेमा जोड दिनुभयो। झिझियाजस्ता परम्परागत सांस्कृतिक प्रस्तुतिले समुदायको मौलिक पहिचानलाई जीवन्त राख्न सहयोग गर्ने उहाँले बताउनुभयो।
मिथिलाञ्चल समाज रुपन्देहीका अध्यक्ष अमरकुमार झाले समाजले विभिन्न जातजाति, धर्म, भाषा र समुदायका व्यक्तिहरूलाई सामाजिक सूत्रमा जोड्दै भाषा, संस्कृति, परम्परा तथा रीतिरिवाजको संरक्षणका लागि काम गर्दै आएको बताउनुभयो। उहाँले मौलिक सांस्कृतिक पहिचान जोगाउन सबैको सामूहिक प्रयास आवश्यक रहेको उल्लेख गर्नुभयो। यस्ता कार्यक्रमले सामाजिक तथा सांस्कृतिक विविधताबीच एकता कायम गर्नुका साथै समुदायका चाडपर्व, लोककला र परम्परालाई नयाँ पुस्तासम्म पुर्याउन महत्त्वपूर्ण भूमिका खेल्ने उहाँको भनाइ थियो।
त्यसैगरी, समाजका महासचिव सियाराम यादवले समाजले आफ्ना गतिविधिमार्फत समुदायको भाषा, संस्कृति, परम्परा र सामाजिक एकतालाई प्राथमिकता दिँदै आएको बताउनुभयो। यस्ता कार्यक्रमले समुदायका सदस्यबीच भेटघाट, विचार आदानप्रदान र आपसी सम्बन्ध सुदृढ गर्ने अवसर प्रदान गर्ने उहाँले उल्लेख गर्नुभयो। मौलिक चाडपर्व र सांस्कृतिक परम्परालाई निरन्तरता दिन सामाजिक संस्थाको सक्रियता र समुदायका सदस्यको सहभागिता आवश्यक रहेको उहाँको भनाइ थियो।
झिझिया नृत्यको सांस्कृतिक तथा धार्मिक महत्त्वबारे प्रकाश पार्दै मिथिलाञ्चल महिला समाज रुपन्देहीकी उपाध्यक्ष विभा झाले झिझिया मिथिलाञ्चल समुदायको धार्मिक आस्था, लोकविश्वास र परम्परासँग जोडिएको मौलिक लोकनृत्य भएको बताउनुभयो। उहाँका अनुसार दसैँका अवसरमा दुर्गा भगवतीको आराधना गर्दै परिवार तथा बालबालिकाको सुख, शान्ति, स्वास्थ्य र कल्याणको कामना गर्ने परम्परासँग झिझिया जोडिएको छ।
झाले झिझिया मनोरञ्जनका लागि गरिने नृत्य मात्र नभई समुदायको सांस्कृतिक पहिचान र पुस्तौँदेखि हस्तान्तरण हुँदै आएको परम्पराको प्रतीकसमेत भएको उल्लेख गर्नुभयो। लोकगीत, नृत्यशैली र परम्परागत विधिमार्फत समुदायको मौलिक जीवनशैली तथा धार्मिक विश्वास अभिव्यक्त हुने बताउँदै उहाँले यस्ता परम्पराको संरक्षणमा महिला तथा युवापुस्ताको सहभागिता बढाउनुपर्नेमा जोड दिनुभयो।
कार्यक्रममा मिथिलाञ्चल समाज रुपन्देहीका कोषाध्यक्ष दशरथ भक्त तथा समाजसेवी तारकेश्वर कान्दु लगायतले विजयादशमी, शुभदीपावली र छठ पर्वको शुभकामना व्यक्त गर्नुभएको थियो। वक्ताहरूले चाडपर्वले सामाजिक सद्भाव, सहिष्णुता र एकताको भावना बढाउन सहयोग पुर्याउने धारणा राख्नुभएको थियो।
कार्यक्रममा मिथिलाञ्चल समुदायको सांस्कृतिक पहिचान झल्किने विभिन्न नृत्य तथा सांस्कृतिक प्रस्तुति गरिएको थियो। कलाकार तथा नृत्य प्रस्तुत गर्ने व्यक्तित्वहरूलाई नगदसहित सम्मान गरिएको थियो। मिथिलाञ्चल समाज रुपन्देहीका महासचिव सियाराम यादवले सञ्चालन गर्नुभएको कार्यक्रममा समाजका पदाधिकारी, सदस्य तथा विभिन्न क्षेत्रका व्यक्तिहरूको सहभागिता रहेको थियो।
प्रकाशित मिति: २०२६-१०-१६ , समय : २३:१४:१३ , १ घन्टा अगाडि