गौतमबुद्ध अन्तर्राष्ट्रिय विमानस्थल पूर्ण रुपमा सञ्चालनको माग गर्दै शान्तिपूर्ण प्रदर्शन

रुपन्देही खबर , २८३  पटक हेरिएको

भैरहवा, मंसिर २२

रुपन्देहीको भैरहवास्थित गौतम बुद्ध अन्तर्राष्ट्रिय विमानस्थल पूर्ण र नियमित सञ्चालनको माग गर्दै चरणबद्ध आन्दोलन सुरु भएको छ ।विमानस्थल नियमित रूपमा सञ्चालन गर्न विभिन्न निकायमा ज्ञापनपत्र बुझाएको सिद्धार्थ सञ्जाल, रुपन्देहीले  शुक्रबार भैरहवामा शान्तिपूर्ण प्रदर्शन गरेको छ । उक्त आन्दोलनलाई लुम्बिनी प्रदेशका गृहमन्त्री सन्तोष पाण्डेयले पनि साथ दिनु भएको छ ।

विभिन्न संघ–संस्थाको सहभागितामा भैरहवाको देवकोटा चोकबाट सुरु भएको ¥याली बैंकरोड, नारायणपथ, बर्मेली टोल हुँदै बुद्ध चोकमा पुगेर समापन भएको थियो । रयालीमा सहभागीहरूले विमानस्थल सञ्चालनको माग गर्दै नाराबाजी समेत गरेका थिए ।

विमानस्थलबाट नियमित रूपमा अन्तर्राष्ट्रिय उडानको माग गर्दै भैरहवामा शान्तिपूर्ण जनदबाब रयाली तथा विरोध प्रदर्शन गरिएको सिद्धार्थ सञ्जाल रुपन्देहीका अध्यक्ष अनिल कुमार ज्ञवालीले बताउनु भएको छ ।

रयालीमा लुम्बिनी प्रदेश सरकारका प्रवक्ता तथा गृहमन्त्री सन्तोष कुमार पाण्डेय, संविधानसभा सदस्य तथा सिद्धार्थनगर नगरपालिकाका प्रमुख इश्तियाक अहमद खान, लुम्बिनी प्रदेश सभा सदस्य हेमा बेल्बासे के.सी,सिद्धार्थनगर नगरपालिकाका जनप्रतिनिधिहरू, उद्योगी, व्यवसायी, विभिन्न संघ संस्थाका प्रमुख तथा प्रतिनिधि एवं नगरवासीहरुको सहभागिता रहेको थियो ।

प्रदर्शनपछि बुद्ध चोकमा आयोजित कार्यक्रममा बोल्दै लुम्बिनी प्रदेशका गृहमन्त्री पाण्डेयले प्रदेश सरकारले नेतृत्व लिएर विमानस्थल सञ्चालनमा ल्याउने प्रतिबद्धता जनाउनु भएको छ । उहाले विमानस्थल सञ्चालनका लागि सञ्जालले पर्यटन मन्त्रीदेखि प्रधानमन्त्रीसम्मलाई ज्ञापनपत्र बुझाए पनि सञ्चालन नहुँदा पर्यटन क्षेत्रमा ठुलो नोक्सान पुगेको बताउनु भएको छ ।

सञ्जालका वरिष्ठ उपाध्यक्ष चन्द्रप्रकाश श्रेष्ठले विमानस्थल पूर्ण रुपमा सञ्चालन भए पचासौँ लाख पर्यटक आउने बताउनु भएको छ । उहाले विमानस्थल नचल्दा उद्योगी–व्यवसायी दयनीय अवस्थामा पुगेको बताउनु भएको छ ।

सञ्जालले माग पूरा नभए विमानस्थलमा धर्नादेखि आन्तरिक उडान रोक्न टिकट नकाट्ने चेतावनी समेत दिएको छ ।

प्रकाशित मिति: २०२३-१२-०८ , समय : १९:०५:५५ , ६ महिना अगाडि