रुपन्देही खबर , ९७ पटक हेरिएको
भैरहवा, मंसिर ७
रुपन्देहीको भैरहवामा जारी सातौं लुम्बिनी महोत्सव–२०८२ (उद्योग, व्यापार, कृषि तथा पर्यटन प्रवद्र्धन) मा हालसम्म ३५ हजार जना बढी दर्शकले अवलोकन गरेका छन् । चेम्बर अफ कमर्श, रुपन्देही (उद्योग व्यापार संगठन, रुपन्देही) को आयोजनामा मंसिर ३ गतेदेखि सिद्धार्थनगर नगरपालिका–८ स्थित अञ्चलपुरमा महोत्सव सुरु भएको थियो ।
मंसिर ६ गते (शनिबार) सम्म ३५ हजार बढी दर्शकले अवलोकन गरेको संस्थाका सचिव कृष्ण प्रसाद पाण्डेले बताउनुभयो । सचिव पाण्डेका अनुसार शनिबार (हिजो) १५ हजार बढी दर्शकले महोत्सवको अवलोकन गरेका छन् । त्यस्तै शनिबारसम्म करिब १ करोड बढीको कारोबार भएको संस्थाका कोषाध्यक्ष तथा महोत्सवको आर्थिक व्यवस्थापन उपसमिति संयोजक धिरज कुमार मल्लिकले जानकारी दिनुभयो ।
???????
‘स्थानीय बजारमा खरिद गरौं, स्थानीय बजारको प्रवर्धन गरौं, स्वदेशी वस्तुको प्रयोग गरौं, स्वाभिमानी नेपालीको पहिचान बनाऔं’ भन्ने मूल नाराका साथ आयोजना गरिएको महोत्सव मंसिर २१ गतेसम्म सञ्चालन हुने चेम्बर अफ कमर्श, रुपन्देहीका अध्यक्ष तथा महोत्सव मूल आयोजक समितिका संयोजक सचिन रोक्काले बताउनुभयो । महोत्सवले उद्योगी–व्यवसायी र उपभोक्तालाई जोड्न पुलको काम गर्ने अध्यक्ष रोक्काले बताउनुभयो । उहाँले महोत्सवमा ३ सय वटा स्टल रहेको जानकारी दिनुभयो ।
यसपटकको महोत्सवको मुख्य आकर्षण नेपालमै पहिलोपटक भियतनामबाट ल्याइएको ‘जलपरी’ र फिस टनेल प्रदर्शन रहेको छ । महोत्सवमा स्थानीयदेखि राष्ट्रिय कलाकारसम्मको प्रस्तुती रहेको संस्थाका पूर्वअध्यक्ष नारायण प्रसाद भण्डारीले बताउनुभयो । सातौं लुम्बिनी महोत्सवमा करिब १ करोड खर्च हुने र करिब १ लाख ५० हजार दर्शकले अवलोकन अपेक्षा रहेको संस्थाको महासचिव लक्ष्मी अधिकारीले बताउनुभयो । महोत्सवमा करिब ५ करोड रुपैयाँ बराबरको कारोबार हुने आयोजकको भनाइ छ ।
प्रकाशित मिति: २०२५-११-२३ , समय : २१:१३:५१ , १५ घन्टा अगाडि