रुपन्देही खबर , ७२ पटक हेरिएको
रुपन्देही, भदौ १५
रुपन्देहीको शुद्धोद्वन गाउँपालिका–३ मा अवस्थित ज्ञान ज्योति स्वावलम्बन बचत तथा ऋण सहकारी संस्थाको २७ औं वार्षिक साधारण सभा तथा ११ औं अधिवेशन एक कार्यक्रमका बिच सम्पन्न भएको छ । सभाले पुनः शेरबहादुर थापाको अध्यक्षतामा नयाँ कार्यसमिति सर्वसम्मत चयन गरेको छ । नव–निर्वाचित कार्यसमितिको उपाध्यक्षमा टिकादेवी न्यौपाने, सचिवमा रमेश गौतम, कोषाध्यक्षमा लक्ष्मण दर्जी र सदस्यहरूमा सुमन थापा क्षेत्री, मिना राना क्षेत्री, शान्ता शर्मा, हिमबहादुर केसी तथा मातृका प्रसाद चौधरी थारु रहेका छन् ।त्यसैगरी सुपरिवेक्षण लेखा समितिमा सुवास फौदार क्षेत्री संयोजक तथा जमुना खत्री र गीता क्षेत्री फौदार सदस्य चयन हुनु भएको छ ।
शेरबहादुर थापाको अध्यक्षता तथा जिल्ला समन्वय समिति रुपन्देहीका प्रमुख उमाकान्त चपाईंको प्रमुख आतिथ्यतामा सम्पन्न भएको २७ औं वार्षिक साधारण सभालाई सम्बोधन गर्नु हुदै प्रमुख अतिथि चपाईंले सहकारीलाई गाउँघरको आर्थिक मेरुदण्ड भन्दै सहकारीले सदस्यहरूको जीवनस्तर उकास्न महत्वपूर्ण योगदान दिइरहेको बताउनु भएको छ । उहाँले “सहकारीहरू आत्मनिर्भर अर्थतन्त्र निर्माणको आधारशिला भएको बताउदै यसलाई पारदर्शी र जिम्मेवार बनाएर अघि बढाउनु जरुरी रहेको बताउनु भएको छ ।
यस्तै गरी अध्यक्ष शेरबहादुर थापाले सहकारीलाई अझै मजबुत, पारदर्शी र सदस्यमुखी बनाउन आफूले नयाँ कार्यसमितिसँग मिलेर गर्ने प्रतिबद्धता व्यक्त गर्नुभएको छ । उहाँले “सदस्यहरूको हितका कामलाई पहिलो प्राथमिकता दिँदै सहकारीको पहुँचलाई अझै फराकिलो बनाउने हाम्रो लक्ष्य भएको बताउनु भएको छ ।
सभामा निवर्तमान उपाध्यक्ष पार्वता थापाको स्वागत मन्तव्य रहेको कार्यक्रममा सहकारी संघ रुपन्देहीका महासचिव दामोदर पंगेनी, सहकारी संजाल शुद्धोद्वन गाउँपालिका अध्यक्ष लेखबहादुर खत्री र गणपति बहुउद्देश्यीय सहकारीका अध्यक्ष गोविन्द घिमिरे लगायतले शुभकामना मन्तव्य राख्नु भएको थियो । भने कार्यक्रम संचालन सहकारीका सचिव रमेश गौतमले गर्नुभएको थियो । कार्यक्रममा अध्यक्ष शेरबहादुर थापाले अध्यक्षीय प्रतिवेदन, सचिव रमेश गौतमले साङ्गठनिक प्रतिवेदन, लेखा समिति सदस्य सुवास फौदारले लेखा प्रतिवेदन र कोषाध्यक्ष लक्ष्मण दर्जीले आर्थिक प्रतिवेदन प्रस्तुत गर्नुभएको थियो ।
प्रकाशित मिति: २०२५-०८-३१ , समय : ०८:५७:२४ , १२ घन्टा अगाडि