रुपन्देही खबर , ६९ पटक हेरिएको
काठमाण्डाै,भदौ १५
मानव अङ्ग मृगौला बेचबिखनमा संलग्न गिरोहका मुख्य नाइकेसहित थप दुई जना पक्राउ परेका छन् । मानव बेचबिखन अनुसन्धान ब्युराेले आज पत्रकार सम्मेलन गरेर पक्राउ परेका सिन्धुपाल्चोकका श्याम कृष्ण भण्डारी र उनका सहयोगी सुजन भारतीलाई सार्वजनिक गरेको हो । गिरोहका नाइके रहेका भण्डारीलाई महेन्द्रनगर र भारतीलाई वीरगञ्ज नाकाबाट पक्राउ गरेको प्रहरीले जनाएको छ । भण्डारी नेतृत्वको गिरोहले भारतमा लगेर पाँच जना नेपालीको मिर्गौला बेचेको खुलेको छ ।
यो गिरोहले सिन्धुपाल्चोक, काभ्रे, सिन्धुली, नुवाकोट, धादिङ लगायतका जिल्लामा पुगेर विभिन्न प्रलोभनमा पारी भारतमा लगेर मृगौला बेच्ने गरेकोबारे प्रहरीले जानकारी गराएको छ ।
उनीहरूलाई सङ्गठित अपराध अन्तर्गत कारबाही अघि बढाइएको ब्युरोका प्रमुख एवम् प्रहरी वरिष्ठ उपरीक्षक कृष्णप्रसाद पङ्गेनीले जानकारी दिनुभयो । उहाँका अनुसार गिरोहले प्रलोभनमा पारेर भारत पुर्याउने र मिर्गाैला झिकेपछि कतिपयलाई पैसा नदिई फर्काउने गरेको पाइएको छ । प्रहरीले लिएको प्रारम्भिक बयानका क्रममा भण्डारीले एक जनाको मृगौला बापत ६ लाख भारतीय रुपैयाँ लिने गरेको स्वीकारेका छन् । यसअघि गिरोहका पाँच जना पक्राउ परेका थिए । उनीहरू एक सय जनाभन्दा धेरै व्यक्तिको मिर्गौला बेचबिखनमा संलग्न भएको प्रहरीको अनुसन्धानमा खुल्न आएको छ ।
प्रकाशित मिति: २०२५-०८-३१ , समय : २२:३६:३२ , ४ घन्टा अगाडि