रुपन्देही खबर , २९ पटक हेरिएको
भैरहवा, असोज २
जनता समाजवादी पार्टी जसपा नेपाल जिल्ला समिति, रुपन्देहीले असोज ३ गते शनिबार ९भोली० भैरहवामा आयोजना गर्न लागेको तत्कालीन जसपा रुपन्देही र तत्कालीन लोकतान्त्रिक समाजवादी पार्टी लोसपा रुपन्देहीबीचको समायोजन कार्यक्रमप्रति लोसपा रुपन्देहीले आपत्ति जनाएको छ ।
लोसपा रुपन्देहीका जिल्ला अध्यक्ष रवि कुमार रौनियारले शुक्रबार सूचना जारी गर्दै पार्टीको तर्फबाट समायोजन कार्यक्रमका विषयमा कुनै निर्णय नभएको बताउनुभयो । उहाँले तत्कालीन लोसपा रुपन्देहीका नेता तथा कार्यकर्तालाई जसपाले आयोजना गरेको भनिएको समायोजन कार्यक्रममा सहभागी नहुन आग्रह समेत गर्नुभयो ।
अध्यक्ष रौनियारले लोसपा रुपन्देहीको निर्णय र सहमतिबिना हुने एकतर्फी समायोजनलाई ‘अवैधानिक र गैरकानूनी’ रहेको दावी गर्नुभयो । समायोजनका विषयमा दुई पक्षबीच संस्थागत रुपमा सहमति र निर्णय नभएको अवस्थामा एक पक्षले मात्र कार्यक्रम आयोजना गर्नु उचित नहुने उहाँको भनाइ छ ।
‘हामी सम्माजनक समायोजनको पक्षमा छौं । तर, लोसपा रुपन्देहीलाई अवमूल्यन गरी बिलय गराउने प्रयासको घोर निन्दा गर्दछौं, ’उहाँले भन्नुभयो । जसपा नेपाल रुपन्देहीले भने असोज ३ गते भैरहवामा तत्कालीन जसपा र लोसपाबीचको समायोजन कार्यक्रम गर्ने तयारी गरेको छ ।
प्रकाशित मिति: २०२६-०९-१९ , समय : ००:२५:०१ , ५४ मिनेटutes अगाडि