रुपन्देही खबर , १४ पटक हेरिएको
तस्वीर : रासस
प्रधानमन्त्री वालेन्द्र शाहले तेस्रो संस्करणको नेपाल प्रिमियर लिग (एनपीएल) को उद्घाटन गर्नुभएको छ । कीर्तिपुरमा रहेको त्रिवि अन्तर्राष्ट्रिय क्रिकेट मैदानमा प्रधानमन्त्री शाहले अम्पायरलाई बल प्रदान गरेसँगै एनपीएलको औपचारिक उद्घाटन भएको हो ।
तस्वीर : रासस
उद्घाटन खेलमा अहिले साविक विजेता लुम्बिनी लायन्स र उपविजेता सुदूरपश्चिम रोयल्स खेलिरहेका छन् । लुम्बिनीले टस जितेर बलिङ रोजेपछि सुदूरपश्चिमले ब्याटिङ गरिरहेको छ । यस पटकको विजेता टोलीले १ करोड ५० लाख रुपैयाँ पुरस्कार पाउनेछ । यस्तै उपविजेताले ८० लाख, तेस्रोले ४० लाख र चौथो हुने टोलीले ३० लाख रुपैयाँ पुरस्कार पाउनेछन् ।
पहिलो पटक डीआरएसको प्रयोग, अन्तर्राष्ट्रिय क्रिकेट परिषद् (आईसीसी) बाट मान्यता, विदेशी खेलाडीको उत्साहजनक सहभागिता, दर्शकको बढ्दो चासो र प्रतियोगितासँग जोडिएको व्यावसायिक गतिविधिले यसपालिको एनपीएललाई थप विशेष बनाएको छ ।
नेपाल क्रिकेट सङ्घ (क्यान) ले लिग चरणका खेलमा साधारणतर्फको टिकटको दर पाँच सय र प्रिमियमतर्फको एक हजार रुपैयाँ निर्धारण गरेको छ । यस्तै एलिमिनेटर र फाइनल खेलका लागि भने साधारणतर्फको टिकट दर एक हजार र प्रिमियमतर्फको दुई हजार रुपैयाँ तोकिएको छ ।
एनपीएलमा लुम्बिनी र सुदूरपश्चिमसहित विराटनगर किङ्ग्स, चितवन राइनोज, पहिलो संस्करणको विजेता जनकपुर बोल्ट्स, कर्णाली याक्स, काठमाण्डु गुर्खाज र पोखरा एभेन्जर्स गरी ८ वटा टोली सहभागी छन् । प्रतियाेगिता आउँदो मङ्सिर ५ गतेसम्म चल्नेछ ।
प्रकाशित मिति: २०२६-१०-२६ , समय : १८:४८:२६ , १ घन्टा अगाडि