चोरी घटनाको मूख्य नाइके गोरखपुरकी “लेडी डन” भैरहवाबाट पक्राउ

रुपन्देही खबर , १०४९  पटक हेरिएको

भैरहवा , असार २१

भारतको गोरखपुरमा “लेडी डन” को नामले चर्चित गीता तिवारीलाई रुपन्देही प्रहरीले भैरहवाबाट पक्राउ गरेको छ । चोरी, लुट, हत्या आरोप लगायतको घटनामा संलग्न रहेको आरोपमा भारतीय प्रहरीको हिरासतमा रहेकी उनि धरौटीमा रिहा भएकी थिईन । तिवारीलाई रुपन्देही प्रहरीले बिभिन्न चोरीको घटनामा संलग्न रहेको आरोपमा पक्राउ गरेको हो ।

रुपन्देही प्रहरी प्रमुख प्रहरी उपरिक्षक भरत बहादुर विश्वकर्माका अनुसार तिवारी भैरहवामा भएको सिलसिलेवार चोरी घटनाकी मूख्य आरोपी हुन । भारत गोरखपुर बस्ने ४३ बर्षिय गीता तिवारीले बैशाख ९ गते सिद्धार्थनगर नगर पालिका वडा नम्बर ३ बस्ने हेमन्त कुमार हलवाईको घरबाट सुनका गरगहना सहित ५० लाख बराबरको चोरी गरेको घटनामा संलग्न रहेको एसपी विश्वकर्माले बताउनु भएको छ।
यस्तै बैशाख २३ गते सिद्धार्थनगर नगर पालिका वडा नम्बर ३ बस्ने डाक्टर नरेन्द्र चौधरीको घरबाट सुन चाँदीका गहना, ल्यापटप र ३ लाख ८० हजार रुपैया चोरी गरेको, जेठ ३ गते सिद्धार्थनगर नगर पालिका वडा नम्बर ८ बस्ने हुमनाथ पाण्डेको घरबाट ६० हजार नगद सहित ल्यापटप, मोबाईल, सुनको औठी चोरी गरेको आरोप प्रहरीले लगाएको छ ।

तिवारीकै समूहले असार ११ गते सिद्धार्थनगर नगर पालिका वडा नम्बर ९ बस्ने श्याम सुन्दर अग्रवालको घरबाट सुनको गहना, ल्यापटप मोबाईल लगायत नगद १ लाख १५ हजार लुटेको प्रहरीको दावी छ । प्रहरीले तिवारीलाई सिद्धार्थनगर नगर पालिका वडा नम्बर ३ बस्ने दिपक यादवको घरबाट पक्राउ गरेको जनाएको छ । प्रहरीले तिवारीबाट कटुवा पेस्तोल जस्तो देखिने पेस्तोल १ थान, केएफ ७ दशमलव ६५ लेखेको गोली ३ राउण्ड, २ वटा खुकुरी, १ वटा चक्कु, सलाई रिन्च ३ वटा, छिनो १ वटा, एक वटा मोटरसाईकल , भारतीय नम्बर प्लेट भएको स्कुटि १ वटा, ग्यासकटर, ७ हजार ६ सय ६५ नेपाली रुपैया र ५ हजार ४ सय ४५ भारतीय रुपैया बरामद भएको एसपी बिश्वकर्माले बताउनु भएको छ ।

पक्राउ परेकी तिवारीलाई चोरी तथा डाका सम्बन्धि कसुरमा ५ दिन म्याद थप गरि अनुसन्धान भईरहेको उहाले बताउनु भएको छ । यस्तै हातहातियार तथा खरखजाना सम्बन्धि कसुरमा समेत अनुसन्धान भईरहेको विश्वकर्माको भनाई छ । तिवारीका समूहका अन्य सदस्यहरुको समेत खोजी भईरहेको उहाले बताउनु भएको छ ।

प्रकाशित मिति: २०२३-०७-०६ , समय : १८:१२:१३ , ८ महिना अगाडि