पार्वती थारु , ७४ पटक हेरिएको
तिलोत्तमा,भदौ १३
थारु समुदायको सबैभन्दा ठूलो पर्व वड्का अत्तवार र अनन्ताको शुभ अवसरमा तिलोत्तमा नगर समितिद्वारा आयोजित शुभकामना आदानप्रदान कार्यक्रम बिहिवार तिलोत्तमा–१३, वभनीस्थित थारु संस्कृति प्रवर्द्धन संग्रहालयमा सम्पन्न भएको छ।
कार्यक्रममा प्रमुख अतिथि तथा तिलोत्तमा नगरपालिकाकी उपमेयर जागेश्वर देवी चौधरीले थारु समुदायले परम्परादेखि श्रद्धा भावका साथ मनाउँदै आएको अत्तवार र अनन्ता पर्वले दाजुभाइ–दिदीबहिनी बीच प्रेम, आत्मीयता र सफलताको कामना गर्ने परम्परा रहेको बताउनुभएको छ । उहाँले लुम्बिनी प्रदेश सरकारले भदौ ८ गते अत्तवारी पर्वको अवसरमा सार्वजनिक बिदा दिए पनि रुपन्देहीमा तीजपछि मनाइने वड्का अत्तवार र अनन्ता पर्वलाई ध्यानमा राख्दै तिलोत्तमा नगरपालिकाले भदौ १५ गते आइतबार स्थानीय बिदा दिएको जानकारी दिनुभयो।
त्यसैगरी प्रमुख वक्ता जनकवि बमबहादुर थारुले रुपन्देहीमा तीजपछि पर्ने आइतबारलाई वड्का अत्तवारका रूपमा मनाउने परम्परा रहेको स्पष्ट पार्दै थारु समुदायले औंसी बाहेकका पर्व चन्द्रमा उदाउने समयमा मात्रै मनाउने प्रचलन रहेको बताउनुभयो। उहाँले थारु धर्म–संस्कृति प्रकृतिसँग नजिक रहेको उल्लेख गर्दै “हामी बुद्ध दर्शन मान्छौँ, बुद्ध धर्म होइन दर्शन हो, जसले अहिंसाको बाटो छोडेर सत्यको मार्गमा हिँड्न प्रेरणा दिन्छ,” भन्नुभयो।
थारु होमस्टे सेमरीका अगुवा हरिचन्द्र चौधरीले परम्परागत किंवदन्तीअनुसार भीमपूजा गर्ने प्रचलन रहेको र तीजपछि ६ दिनमै आइतवार परेमा छठिया तथा अर्को हप्ताको आइतवार वड्का अत्तवार पर्व मान्ने गरिने चलन रहेको बताउनु भएको छ । उहाँका अनुसार यो पर्वमा महिला–पुरुष दुवैले व्रत बस्ने परम्परा छ।
कार्यक्रममा थारु कल्याणकारिणी सभा रुपन्देहीका अध्यक्ष कमल नारायण थारु, सचिव सरिता चौधरी, सल्लाहकार सत्यनारायण चौधरी लगायतले शुभकामना मन्तव्य राख्नुभएको थियो। अध्यक्ष आशाकुमारी थारुको अध्यक्षतामा भएको कार्यक्रममा उपाध्यक्ष अयोध्य चौधरीले स्वागत मन्तव्य राख्नु भएको थियो भने सचिव दिनानाथ कवरले कार्यक्रम सञ्चालन गर्नुभएको थियो।
कार्यक्रममा थारु कल्याणकारिणी सभाका पदाधिकारी, सल्लाहकार, सदस्य तथा स्थानीय प्रतिनिधिहरूको उल्लेखनीय उपस्थिति रहेको थियो। परम्पराअनुसार यो पर्वमा गहुँको रोटी र चिनी केराको पातमा खाने, भोलिपल्ट गँगटा–केखणा वा माछा मारेर पारन गर्ने, दिदीबहिनीलाई नयाँ कपडा र परिकार उपहार दिने तथा भान्जा–भान्जीलाई दाल, चामल, आलु लगायतका सामग्री राखी दान गर्ने चलन रहेको छ। थारु इतिहासका घाम (सुर्य) भनिने अग्रजहरूको त्याग र बलिदानको सम्झनामा यस दिन पितृदेवलाई स्मरण गर्दै व्रत बस्ने परम्परा रहेको जनाइएको छ।
प्रकाशित मिति: २०२५-०८-२९ , समय : १३:४५:१५ , ९ घन्टा अगाडि