रुपन्देही खबर , ३० पटक हेरिएको
भैरहवा, साउन १५
रुपन्देहीको सिद्धार्थनगर नगरपालिका–१२ स्थित खड्का खाजाघरबाट नक्कली भारतीय नोटसहित दुई जना भारतीय नागरिकलाई प्रहरीले पक्राउ गरेको छ।
खड्का खाजाघरमा नक्कली भारतीय नोटको कारोबार भइरहेको भन्ने विशेष सूचनाका आधारमा वडा प्रहरी कार्यालय भैरहवाबाट खटिएको प्रहरी टोलीले छापा मार्दा उनीहरूलाई नियन्त्रणमा लिइएको हो।
प्रहरीका अनुसार पक्राउ परेका दुवै जनाको साथबाट भारतीय ५०० दरका १४० थान नक्कली नोट बरामद गरिएको छ, जसको कुल मूल्य भारतीय ७० हजार रुपैयाँ रहेको छ।
त्यसैगरी उनीहरूको साथबाट सक्कली भारतीय मुद्रा २ हजार ७ सय ५८ रुपैयाँ, नेपाली नगद २ हजार १ सय ८० रुपैयाँ तथा दुई थान मोबाइल फोनसमेत बरामद गरिएको प्रहरीले जनाएको छ।
जिल्ला प्रहरी कार्यालय रुपन्देहीका सूचना अधिकारी कृष्णकुमार चन्द का अनुसार पक्राउ परेका दुवै जनामाथि नक्कली मुद्रा कारोबार सम्बन्धी कसुरमा थप अनुसन्धान भइरहेको छ। आवश्यक कानुनी प्रक्रिया अघि बढाइएको प्रहरीले जनाएको छ।
प्रकाशित मिति: २०२६-०७-३१ , समय : १४:०९:४० , १ घन्टा अगाडि