रुपन्देही खबर , ५९ पटक हेरिएको
भैरहवा,जेठ २५
विद्यार्थीहरूको भाषिक क्षमता, सिर्जनशीलता र आत्मविश्वास अभिवृद्धि गर्ने उद्देश्यले निजी तथा आवासीय विद्यालय अर्गनाइजेशन (प्याब्सन) सिद्धार्थनगर, रुपन्देहीले भैरहवामा अन्तरविद्यालयस्तरीय कविता वाचन प्रतियोगिता सम्पन्न गरेको छ। प्याब्सन सिद्धार्थनगरका अध्यक्ष उदय कुमार मल्लिकको अध्यक्षता तथा प्याब्सन लुम्बिनी प्रदेशका कोषाध्यक्ष महेश भुर्तेलको प्रमुख आतिथ्यतामा आयोजित प्रतियोगितामा १७ वटा विद्यालयका विद्यार्थीहरूको उत्साहजनक सहभागिता रहेको थियो। प्रतियोगितामा कक्षा ४ देखि ७ सम्म अध्ययनरत विद्यार्थीहरूले ‘मेरो देश, मेरो गौरव’ विषयमा कविता प्रस्तुत गरेका थिए।
कार्यक्रममा बोल्दै अध्यक्ष उदय कुमार मल्लिकले विद्यार्थीहरूमा लुकेर रहेका प्रतिभालाई उजागर गर्दै भाषिक तथा सिर्जनात्मक क्षमताको विकास गर्ने उद्देश्यले प्रतियोगिता आयोजना गरिएको बताउनुभयो। उहाँले यस्ता कार्यक्रमले विद्यार्थीहरूलाई आफ्नो अभिव्यक्ति प्रस्तुत गर्ने अवसर प्रदान गर्नुका साथै आत्मविश्वास बढाउन महत्वपूर्ण योगदान पुर्याउने विश्वास व्यक्त गर्नुभयो।
प्रतियोगितामा युनिभर्सल पब्लिक स्कूलकी आरती चापागाई प्रथम, यूरो टाईनी टडलर्सका उत्सव जी.सी. द्वितीय, आर्य पब्लिक स्कूलकी समृद्धि खड्का तृतीय तथा न्यू ईरा इङ्लिस बोर्डिङ स्कूलकी प्रकृति बरुवाल तृतीय हुन सफल भएका छन्।
कार्यक्रमको उद्घाटन गर्दै प्रमुख अतिथि तथा प्याब्सन लुम्बिनी प्रदेशका कोषाध्यक्ष महेश भुर्तेलले विद्यालय शिक्षा केवल पाठ्यपुस्तक र परीक्षामा प्राप्त अंकमा मात्र सीमित हुन नहुने बताउनुभयो। उहाँले विद्यार्थीभित्र लुकेर रहेका प्रतिभा, सिर्जनशीलता, नेतृत्व क्षमता तथा अभिव्यक्ति कलाको विकासका लागि यस्ता प्रतियोगिताहरू प्रभावकारी माध्यम बन्ने उल्लेख गर्नुभयो।
भुर्तेलले कविता वाचनजस्ता साहित्यिक गतिविधिले विद्यार्थीहरूको भाषिक दक्षता, आत्मविश्वास, कल्पनाशक्ति र प्रस्तुतीकरण क्षमतामा सकारात्मक प्रभाव पार्ने बताउँदै यस्ता कार्यक्रमले बालबालिकालाई आफ्नो प्रतिभा सार्वजनिक रूपमा प्रस्तुत गर्ने अवसर प्रदान गर्ने धारणा राख्नुभयो। उहाँले प्रतिस्पर्धाले विद्यार्थीहरूमा स्वस्थ प्रतिस्पर्धाको भावना विकास गर्नुका साथै सिकाइ प्रक्रियालाई अझ प्रभावकारी र रुचिकर बनाउने बताउनुभयो।
उहाँले आजका विद्यार्थी नै भोलिका सक्षम नागरिक, नेतृत्वकर्ता तथा राष्ट्र निर्माणका आधारस्तम्भ भएकाले उनीहरूको सर्वाङ्गीण विकासमा विद्यालय, अभिभावक र समाज सबै पक्षले समान रूपमा ध्यान दिनुपर्ने आवश्यकता औंल्याउनुभयो। शैक्षिक उपलब्धिसँगै कला, साहित्य, खेलकुद तथा अन्य अतिरिक्त क्रियाकलापमा सक्रिय सहभागिताले विद्यार्थीहरूको व्यक्तित्व विकासमा महत्वपूर्ण योगदान पुग्ने उल्लेख गर्दै उहाँले प्याब्सन सिद्धार्थनगरले यस्ता सिर्जनात्मक कार्यक्रमलाई निरन्तरता दिएकोमा प्रशंसा व्यक्त गर्नुभयो।
भुर्तेलले बालबालिकाको प्रतिभालाई समयमै पहिचान गरी उचित अवसर र प्रोत्साहन दिन सके भविष्यमा उनीहरू विभिन्न क्षेत्रमा उत्कृष्टता हासिल गर्न सक्षम हुने विश्वास व्यक्त गर्नुभयो। उहाँले यस्ता कार्यक्रमले विद्यार्थीहरूमा देशप्रेम, सामाजिक उत्तरदायित्व र सकारात्मक सोचको विकास गर्न समेत महत्वपूर्ण भूमिका खेल्ने बताउनुभयो।
त्यस्तै, रुपन्देही चेम्बर अफ कमर्सका कोषाध्यक्ष तथा मन्टेश्वरी मेमोरियल हाई स्कूलका अध्यक्ष धिरज कुमार मल्लिकले प्याब्सन सिद्धार्थनगरले शिक्षाको गुणस्तर अभिवृद्धिसँगै खेलकुद, साहित्य, कला तथा विभिन्न अतिरिक्त क्रियाकलापलाई निरन्तर प्राथमिकता दिँदै आएको भन्दै प्रशंसा गर्नुभयो। उहाँले विद्यार्थीको समग्र विकासका लागि कक्षाकोठाभित्रको शिक्षामात्र पर्याप्त नहुने उल्लेख गर्दै उनीहरूमा नेतृत्व क्षमता, अनुशासन, सिर्जनशीलता र आत्मविश्वास विकास गर्न अतिरिक्त क्रियाकलापको महत्वपूर्ण भूमिका रहने बताउनुभयो।
मल्लिकले कविता वाचन प्रतियोगिताजस्ता कार्यक्रमले विद्यार्थीहरूलाई आफ्नो प्रतिभा प्रस्तुत गर्ने अवसर प्रदान गर्नुका साथै भाषा, साहित्य र संस्कृतिप्रति आकर्षण बढाउने धारणा राख्नुभयो। उहाँले यस्ता सिर्जनात्मक कार्यक्रमले विद्यार्थीको बौद्धिक तथा भावनात्मक विकासमा समेत सकारात्मक प्रभाव पार्ने उल्लेख गर्दै शिक्षण संस्थाहरूले पाठ्यक्रमसँगै प्रतिभा प्रस्फुटनका गतिविधिलाई पनि उत्तिकै महत्व दिनुपर्ने बताउनुभयो।
उहाँले प्याब्सन सिद्धार्थनगरले विभिन्न समयमै आयोजना गर्दै आएका शैक्षिक, खेलकुद तथा सांस्कृतिक कार्यक्रमहरूले विद्यार्थीहरूको क्षमता अभिवृद्धिमा उल्लेखनीय योगदान पुर्याएको बताउँदै यस्ता गतिविधिले विद्यालयहरूबीच स्वस्थ प्रतिस्पर्धा र सहकार्यको वातावरण निर्माण गर्न समेत सहयोग पुग्ने विश्वास व्यक्त गर्नुभयो। भविष्यमा पनि यस्ता कार्यक्रमलाई अझ व्यापक र प्रभावकारी ढंगले निरन्तरता दिन आवश्यक रहेको उहाँको भनाइ थियो।
प्रतियोगिताका निर्णायक डिल्लीराज भट्टराईले शिक्षासँगै अतिरिक्त क्रियाकलापलाई समान महत्व दिनु समयको आवश्यकता रहेको उल्लेख गर्दै यस्ता कार्यक्रमले विद्यार्थीहरूको व्यक्तित्व विकासमा टेवा पुग्ने बताउनुभयो।
कार्यक्रम संयोजक तथा प्याब्सन सिद्धार्थनगरका कार्यसमिति सदस्य धर्मेन्द्र कुमार मिश्राले स्वागत मन्तव्य व्यक्त गर्नुभएको कार्यक्रमको सञ्चालन प्याब्सन सिद्धार्थनगरका कोषाध्यक्ष दिपेन्द्र कुमार मल्लिकले गर्नुभएको थियो। कार्यक्रममा टीकाराम भट्टराई, निकेशदेव हटुवाल, प्रतिष्ठा चालिसे, प्रतिक मल्ल, राजेश कुमार चौधरीलगायतको उपस्थिति रहेको थियो। प्रतियोगिताको निर्णायकको भूमिकामा डिल्लीराज भट्टराई र देवी प्रसाद न्यौपाने रहनुभएको थियो।
प्रकाशित मिति: २०२६-०६-०८ , समय : १०:१५:४४ , ३ घन्टा अगाडि