रुपन्देही खबर , २७९ पटक हेरिएको
भैरहवा, भदौ १५
भोटेकोशी नदीमा आएको भीषण बाढीबाट प्रभावित नागरिकको राहतका लागि सिद्धार्थनगर नगरपालिकाकी उपप्रमुख उमा अधिकारीले आफ्नो एक महिनाको पारिश्रमिक राहत कोषमा जम्मा गर्नुभएको छ। बाढीबाट ठूलो जनधनको क्षति भइरहेका बेला उपप्रमुख अधिकारीले आफ्नो तलब नै पीडितको राहतका लागि सहयोग गर्नुभएको हो।
सिद्धार्थनगर नगरपालिकामा आयोजित विपद् व्यवस्थापनसम्बन्धी विशेष कार्यक्रममा अधिकारीले आफ्नो एक महिनाको पारिश्रमिक राहत कोषमा जम्मा गरिसकेको जानकारी गराउनुभएको हो। विपत्तिको समयमा औपचारिक घोषणा र भाषणभन्दा पीडितको उद्धार तथा राहतमा प्रत्यक्ष सहयोग आवश्यक रहेको उहाँले बताउनुभयो।
“विपत्तिको यो घडीमा ठूला–ठूला गफ र घोषणा मात्र गरेर पुग्दैन, पीडित नागरिकको उद्धार र राहतका लागि हामी आफैँले आफ्नो तर्फबाट सिधा सहयोग गर्नुपर्छ,” उहाँले भन्नुभयो।
चीनको स्वशासित क्षेत्र तिब्बतमा गएको हिमपहिरो तथा गेग्रान बहावपछि भोटेकोशी नदीमा आएको आकस्मिक बाढीले नदीको तल्लो तटीय क्षेत्रमा ठूलो क्षति पुर्याएको छ। बाढीका कारण विभिन्न बस्ती प्रभावित हुनुका साथै ठूलो संख्यामा नागरिक बेपत्ता तथा विस्थापित भएका छन्। प्रभावित परिवारलाई तत्काल राहत उपलब्ध गराउने उद्देश्यले उपप्रमुख अधिकारीले व्यक्तिगत रूपमा आफ्नो पारिश्रमिक सहयोग गर्नुभएको हो।
नगरपालिकाले आयोजना गरेको कार्यक्रममा नगर प्रमुख इस्तियाक अहमद खान, उपप्रमुख अधिकारी, प्रमुख प्रशासकीय अधिकृत तथा विभिन्न वडाका अध्यक्षहरूको सहभागिता थियो। कार्यक्रममा भोटेकोशी बाढीबाट भएको क्षति, खोज तथा उद्धार र राहत व्यवस्थापनका विषयमा छलफल गरिएको थियो।
नगर प्रमुख खानले प्राकृतिक विपत्तिबाट प्रभावित नागरिकको उद्धार तथा राहतका लागि जनप्रतिनिधि र प्रशासनिक संयन्त्र एकजुट भएर परिचालन हुनुपर्ने बताउनुभयो। तिब्बतबाट सुरु भएको बाढीले नेपालतर्फ ठूलो मानवीय तथा भौतिक क्षति पुर्याएको भन्दै उहाँले विपद्को सामना गर्न सबै संयन्त्र सक्रिय हुनुपर्नेमा जोड दिनुभयो।
बैठकले बाढी प्रभावित परिवारलाई खाद्यान्न, स्वच्छ खानेपानी, त्रिपाल तथा औषधोपचारलगायत अत्यावश्यक सामग्री उपलब्ध गराउने निर्णयसमेत गरेको छ। राहत व्यवस्थापनलाई प्रभावकारी बनाउन आवश्यकताका आधारमा सहयोग परिचालन गर्ने र प्रभावित परिवारको अवस्थाबारे निरन्तर जानकारी लिने विषयमा पनि छलफल भएको जनाइएको छ।
उपप्रमुख अधिकारीको व्यक्तिगत सहयोगसँगै बैठकमा सहभागी वडा अध्यक्ष तथा प्रशासनिक अधिकारीहरूले पनि राहत तथा उद्धार कार्यमा व्यक्तिगत र संस्थागत रूपमा सहयोग गर्ने प्रतिबद्धता जनाएका छन्।
अधिकारीले यसअघि पनि प्राकृतिक विपत्तिका बेला आफ्नो पारिश्रमिक सहयोग गर्नुभएको जनाइएको छ। जाजरकोट केन्द्रबिन्दु भएर गएको भूकम्पका बेला पनि उहाँले एक महिनाको पारिश्रमिक भूकम्प प्रभावित नागरिकको उद्धार, उपचार तथा पुनःस्थापनाका लागि राहत कोषमा सहयोग गर्नुभएको थियो।
भोटेकोशी बाढी पीडितका लागि पनि एक महिनाको पारिश्रमिक राहत कोषमा जम्मा गरेर अधिकारीले विपत्तिका बेला व्यक्तिगत तहबाट सहयोग गर्ने आफ्नो अभ्यासलाई निरन्तरता दिनुभएको छ।
यसैबीच, सिद्धार्थनगर नगरपालिकाले विपद् जोखिम न्यूनीकरण, खोज तथा उद्धार र राहत वितरणका गतिविधिलाई प्राथमिकतामा राखेको जनाएको छ। प्रभावित क्षेत्रमा आवश्यक सामग्रीको व्यवस्थापन तथा राहत सहयोगलाई प्रभावकारी बनाउन सम्बन्धित निकायसँग समन्वय गरिने नगरपालिकाले जनाएको छ।
प्रकाशित मिति: २०२६-०८-३१ , समय : १६:४३:३५ , ३ हप्ता अगाडि