एजेन्सी , ९८ पटक हेरिएको
तस्वीर : एजेन्सी
चैत १२
इजरायलले इरानी नाैसेना प्रमुख मारिएका दाबी गरेकाे छ । इजरायलले ‘स्ट्रेट अफ हर्मुज’ मा नाकाबन्दीको निरीक्षण गरिरहेका इरानी नौसेना प्रमुख अलिरेजा ताङ्सिरी मारिएका दाबी गरेको बीबीसीले जनाएको छ । यस विषयमा इरानले कुनै टिप्पणी गरेको छैन ।
यस्तै संयुक्त अरब इमिरेट्स (यूएई) को राजधानी आबुधाबीमा मिसाइल आक्रमण रोकिएपछि खसेको भग्नावशेषका कारण दुई जनाएको ज्यान गएको छ ।
मध्यपूर्वमा चलिरहेको द्वन्द्व थप जटिल बन्दै गएको छ । एकातिर सैन्य आक्रमण तीव्र भइरहेका छन् भने अर्कोतिर कूटनीतिक पहलहरू अस्पष्ट र विरोधाभासी देखिएका छन् ।
इजरायल र इरानबीच प्रत्यक्ष आक्रमण आदानप्रदानसँगै क्षेत्रीय तथा अन्तर्राष्ट्रिय शक्तिहरूको भूमिकाले युद्धको दिशा अझ अनिश्चित बनाएको छ । इजरायली सेनाले आज इरानका विभिन्न ठाउँ–विशेषतः इस्फहानजस्ता केन्द्रीय शहरहरूमा आक्रमणको लहर चलाएको जनाएको छ । यसको जवाफमा इरानले प्रक्षेप्यास्त्र आक्रमण गरेपछि इजरायलले आफ्नो हवाई प्रतिरक्षा प्रणाली सक्रिय पारेको थियो ।
युद्धको असर विश्व अर्थतन्त्रमा समेत देखिएको छ । तेलको मूल्यमा वृद्धि भएको छ भने शेयर बजारमा मिश्रित प्रतिक्रिया देखिएको छ । ब्रेन्ट क्रुड तेलको मूल्य प्रतिब्यारेल १०३ दशमलव २५ अमेरिकी डलर पुगेको छ । एशियाली बजारमा उतारचढाव देखिँदा लगानीकर्ताहरू सम्भावित कूटनीतिक समाधानको प्रतीक्षामा छन् ।
अमेरिकी राष्ट्रपति डोनाल्ड ट्रम्पले इरान वार्तामा संलग्न रहेको तर सार्वजनिक रूपमा स्वीकार गर्न डराइरहेको आरोप लगाउनुभएको छ । उहाँकाअनुसार इरानी वार्ताकारहरू आफ्नै पक्षबाट जोखिममा पर्न सक्ने डरले खुलेर कुरा गर्न सकिरहेका छैनन् । तर इरानका विदेशमन्त्री अब्बास अराघचीले स्पष्ट रूपमा वार्ता अस्वीकार गर्दै वर्तमान नीति ‘प्रतिरोध’ मा आधारित रहेको बताउनुभएको छ । उहाँले वार्ता गर्नु भनेको हार स्वीकार्नु सरह हुने धारणा राख्नुभएको छ ।
प्रकाशित मिति: २०२६-०३-२६ , समय : १९:०५:१४ , १ घन्टा अगाडि